A traxedia de Haití e o Software Libre

De todos son sabidos os efectos tráxicos que ten o uso de formatos propietarios ou incompatibles cando se produce unha catástrofe natural, como foron os casos do terremoto/tsunami no índico en 2004 e o furacán Katrina nos EE.UU. en 2005. Como informou o ePolicy Group xusto despois de producirse o tsunami de 2004:

"As axencias de resposta inmediata e os grupos non gobernamentais son incapaces de compartir información vital para os esforzos de rescate. Cada unha usa diferentes formatos de datos e documentación. As operacións de socorro son máis lentas, a coordinación é complicada. A necesidade de normas comúns e abertas para a xestión de desastres nunca tiña sido máis necesaria e obrigada". [1]

5 anos máis tarde, na presente traxedia de Haití, as cousas parece que melloraron moito neste eido:

OpenStreetMap

Como informa Mikel Maron, ás 21:45 do 14/01/2010 xa se tiñan rexistradas máis de 400 sesións de edición en OpenStreetMap dende o comezo do terremoto. A actividade dos "mapeadores" de OpenStreetMap, agrupados nunha lista de crise, estase centrando na identificación e marcado de edificios destruídos, no posicionamento de hospitais, campamentos de asistencia a vítimas, etc.

Moitos grupos de rescate están consultando os datos de OpenStreetMap.org e pedindo que se engadan características particulares. Ducias de "mapeadores" e desenvolvedores están axudando na coordinación do Proxecto Wiki de OpenStreetMap para Haití, no seu IRC e na lista de discusión de OpenStreetMap, subindo actualizacións cada 5 minutos de mapas en formatos Shapefile e Garmin (listos para ser usados nos GPS), e incluso mapas en relieve da zona afectada polo terremoto.

É incrible o progreso, en tan só 48 horas, do OpenStreetMap para a zona do desastre, como se pode apreciar nas dúas capturas que amosamos a continuación:

Antes do terremoto:

48 horas despois do terremoto:

E isto non parece máis que o comezo do esforzo da comunidade de OpenStreetMap coa que esperan contribuír ao enorme traballo de rescate e reconstrución que queda por diante en Haití.

Sahana

Sahana é un aplicativo de Software Libre resultado dun proxecto que naceu precisamente dos problemas de incompatibilidades e uso de formatos propietarios durante as misións de axuda cando o tsunami do índico en 2004.

Os obxectivos de Sahana son:

1. Obxectivo principal: Axudar a aliviar o sufrimento humano e a salvar vidas a través do uso eficiente das TIC durante un desastre.

2. Favorecer a colaboración entre os distintos actores, incluíndo ao goberno, axencias de emerxencia, ONG's, voluntarios espontáneos e vítimas, respondendo a un desastre con efectividade.

3. Fortalecer ás vítimas, aos seus familiares e achegados, para axudarlles a valerse por si mesmos.

4. Protexer os datos das vítimas e reducir as posibilidades de mal uso desta información.

5. Fornecer dunha solución Libre e de código aberto, dispoñible para calquera persoa.

Os esforzos que está a levar a comunidade Sahana para a traxedia de Haití están sendo centralizados nunha wiki, así como no uso do canal IRC #sahana.

[1] Pamela Jones - When Open Standards Really Matter - The Katrina Factor - 13/09/2005